May Arte rin ang Pagtanggap ng Di Sapat na Sahod

Hubad ang kanang kamay
hintaying lumapag ang malamig na pera.
Huwag nang mag-abala pang ungutin ang katambal
na peyslip dahil tiyak namang wala,
ito’y batay na rin sa karanasan.
At dahil ganito muli ang nangyari,
ipasok dahan-dahan, ng di napapansin ng nas-aabot,
ang kaliwang kamay s aiyong kaliwang bulsa.
Unti-unting lamukusin sa loob nito
Ang nauna ng ginawang listahan ng mga bibilhin
(dahil patuloy ka pa ring umaasang magbabago
ang ihip ng hangin)
na alam mong di na magagamit.
Bona magiging am.
Pampers magiging lampin.
Wafers magiging tig-pipisong otap.
Repolyo, patatas, magiging repak pampinakbet.
Isang kilong baboy magiging kalahati.
Tender Juicy mawawala.
At dagdagan ng dalawang supot ng toge at
isang kilong talong pamparami ng dating.
Siguradong matatapos ang pamimili’y
bitbit mo na ang supot ng alternatibs.
Hinding-hindi dapat kalimutan na
itira ang pambili ng hinyebra,
ang inuming magdadala sa’yo
ng alala ng katatapos na pagturo,
siksik, liglig at umaapaw na trabaho.
Inuming magpapabago ng lasa ng pinakbet na
sinasawaan mo na.
At higit sa lahat, inuming may matigas na boteng
gustong-gusto mong ipukpok
sa nagpapasahod sa’yo…